من اسبوعين أم من حوامل طبيبتى كلمتنى وهى منهارة علشان ابنها دخل الحضانة
هى قررت تولد فى نفس المحافظة اللى فيها مامتها ( ودا طبعا شئ مهم جدا فى دعمها نفسيا
)..
اللى حصل إنها عملت سونار هناك وعلى الرغم من كونها فى شهرها التامن إلا إن قياسات السونار أظهرت إن عمر البيبى فى نص التاسع
..
عادى احنا شارحين كويس إن السونار ممكن يقدم أو يأخر فى الشهور الأخيرة من
اسبوعين إلى ٣ أسابيع و مأكدين على إن أهم تاريخ هو التاريخ اللى أخدناه
أول الحمل
..
للأسف اللى حصل إنهم أكدولها إن السونار بيقول إنها ممكن تولد . ولم يهتمو بالبيانات اللى معاها اللى بتأكد إنها فى التامن...
ولأن الفترة دى الأم بتكون تعبانة جدا من حجم بطنها .. فرحت جدا ووافقت على الولادة
..
لكن النتيجة إنها ولدت فى التامن بدون أى سبب طبى واضح للولادة المبكرة ودا طبعا أدى إلى دخول البيبى الحضّانة ..
الحمد لله البيبى خرج النهاردة بعد رحلة متعبة من العلاج والتكاليف وهو دلوقتى زى الفل
ولأن القصة دى مش أول ولا آخر مرة تحصل كان لازم ننقلهالكم ونحذركم منها سواء اللى بيتابعو معانا أو مع زمايلنا الأفاضل ..
كل أمنياتنا بأطفال أصحاء لكل الأمهات
د/ ريهام الشال
أخصائية طب وجراحات النساء و التوليد
شاركى حكايتنا مع كل ماما تعرفيها
