10 تجهيزات قبل التخطيط للحمل مهمة جداااااا لتجنب مشاكل الحمل و الولادة

خلاص قررتى تجيبى ضيف جديد

فى ١٠ تحضيرات مهمة جدااا لو أهملتيهم هيتعبونا جدا أثناء الحمل
أول تحضير
هو إنك هتروحى زى الشاطرة كدا لأقرب معمل ليكى و تعملى صورة دم كاملة ليه بقى ؟لإن أخطر شئ ممكن نشوفه فى الحمل هو .... الأنيميا ، و إوعى تقولى مش مهم انا المهم البيبى ، لإنه أكيد إنتو الاتنين مهمين غير إن الأنيميا العنيفة بتضر الأم والجنين ،تمام كدا الدنيا جميلة و مفيش اى مشكلة فى صورة الدم ؟

تانى تحضير

 علشان خاطر النونو الجاى : سنانك بتوجعك عالجيها ، شعرنا بيقع ابدأى تصليحه حالا ، فى كام حباية كدا فى البشرة بتزعلنا حالا نكون فى عيادة الجلدية ، باختصار اى مشكلة طبية صحية محتاجة علاج نعالجها حالا قبل ما يحصل الحمل و نوقف اى شغل فيها.

تالت تحضير 

هو انتظار الحمل فى مدة بتختلف حسب نوع الوسيلة ، يعنى إننا نزعل علشان محصلش الحمل بعد شهر من وقف البرشام مثلا دا مش منطقى ولو كنتى بتستعملى الحقنة فالمدة ممكن توصل لسنة فى بعض الحالات .

رابع تحضير

 هناخد صديق الخصوبة و الأجنة .. الفوليك أسيد اللى اتكلمنا فى درس سابق عن فوايده و خطورة الإهمال فيه.

خامس تحضير

 تجهيز كل الأمور اللوجيستيه مثلا كنا مقررين ننقل يبقى ننقل قبل الحمل ، عندنا عزومة كبيرة و هنجيب العيلة كلها، نعملها قبل الحمل ، هنشارك فى احتفالات و نشيل السجاجيد و نحطها نشيلها قبل الحمل ...

سادس تحضير

الحالات اللى عندهم تاريخ صلة قرابة بين الزوج و الزوجة أرجوكم فى كام تحليل أبسط من بعض نعملهم هيشيلو عننا مشاكل كتير و تشوهات أجنة بتحصل بنسبة كبيرة من زواج الأقارب .

سابع تحضير

هو اختيار الجهة الطبية المناسبة ليكى و لظروفك الصحية للمتابعة والولادة.

ثامن تحضير

أى أم عارفة إنها تعرضت فى حملها السابق لأى اضطرابات صحية و بتحتاج فحوصات أو وقف أدوية معينة ممنوع أخذها أثناء الحمل .. يبقى رجاء كبير زيارة بسيطة لعيادة النسا هتريحنا من متاعب كتيرة فى فترة المتابعة والولادة.

تاسع تحضير

 هو إنك تاكلى كل الأكلات اللى هنمنعها فى فترة الحمل و اللى اتكلمنا عنها فى درس كامل فى قناة طبيبتى على اليوتيوب .. كل اللى نفسك فيه رنجة بقى برجر، شيبسى ، كلى واشبعى منهم علشان هنوقفهم فى الحمل بإذن الله.
 آخر و أهم تحضير 

هو: وقف الوسيلة سهلة جداا اهى امال ايه.
 دول كانو ١٠ تحضيرات هيفروقو معانا جدا معاكى و مع النونو و مع بباه و مع أختك اللى هتشيلك فترة الحمل و مامتك اللى هتتعب معاكى بعد الولادة ، و جيرانك اللى هيسمعو صوتك بعد كدا و انتى بتذاكرى للعيال اللى هيجو لما يدخلو المدرسة ..

و راجعى كل دروس الحمل الموجودة على قناة طبيبتى على اليوتيوب.
#عيادة_طبيبتىد/ ريهام الشال أخصائية طب وجراحات النساء و التوليد و تأخر الإنجاب٩ شارع صفوت من شارع المطبعة بين الهرم و فيصل الجيزة